Inda tenemos que falar doutros sanjuanes

Cada nuite ten sue maneira de caier, cunsante l bózio que ampunta l sol i mos deixa suspensos de la punta de la manhana. Nunca sabemos adonde la nuite mos lhieba, nunca adebinamos adonde la manhana mos bai a deixar. Até l sol, quando se çpon, dízen que ua beç ha de ser la redadeira, nin que seia deiqui a remelhones d'anhos: mas al sol nun le passará pula cabeça que aqueilha biaige puode nun tener buolta: a la ua l sol nun ten cabeça, a la outra se la tubisse la calentura nun l deixarie pensar. Passamos mos tan debrebe que queda siempre algo por fazer ou algue palabra ou géstio por dezir, mas todo esso somos nós a querer angarrar pula rodriga de l tiempo, squecendo-mos que l tiempo debelga demais para poder serbir de rodriga. Deixa-te ir, que inda nun son horas: assomei-me i inda nun beio la punta de l camino, nin sequiera berdega la nubrina que ancubre l nada que le queda para alhá. Sou capaç de sentir l lhadrar de ls perros, sentado ne l puial, de modo mais rial do que se stubira alhá, ampalpando la mancha parda de l sudor seco na tiesta apuis de la segada, agora dun oulor mais agre. Inda tenemos que acender la fogueira, que yá stan pasmados ls marrolhos, i ls sanjuanes relóucan por cantigas: hemos de saltar i ampuntar la sarna até outra fogueira, que inda hemos de saber qual bai a ser. Tenes la nuite toda para lhembrar ls que saltórun la fogueira ls tous anhos todos, a fazer fé na purficaçon de l fuogo que sana, i n'auga fresca de l'alba que lhaba las malinas, c'un respiro d'ourbalheira a amerosar ls uossos deloridos. Aspera a manhana i hemos de falar de sanjuanes de que inda nun me falestes: stan purparadas las fuolhas de l caderno, i até l oubido xordo se bai abrindo pa t'oubir. Ye agora l tiempo de las pastoricas, de modo que até nestas nuites, mais scuras que ua spera, relhúzen sues lhuzicas, andebles, assi i todo lhuzicas. Quando l sol s'oupir, ben te ambora, que hai sítios adonde nun cumben quedar muito tiempo: cumo dan auga pa manhana, sobra te un die ou dous an que puodes meter folga de regar la huorta.