purmeiras augas

Cerrou-me la puorta l berano: ferbe l mosto i la costra de ls sucos apon-se a la stocada de la semiente que arrebenta; las purmeiras augas pérden-se rue abaixo, ampuntadas sien ua dénia, ua risa de frescor; aspero l ourtuonho ne ls passeios, mas ls altemobles nun déixan campo a mais nada, l lhuito de l alcatron atirado acontra qualquiera assomadeiro de berde. Bien que l spere, nien un frisgo de campo s'anfrisga na cidade, un frisgo por adonde se respire, solo un frisgo i nada mais: algo an mi se muorre na spera: gasto-me desse lhado an que me morri, mas esse coçado solo se me bei muito tiempo apuis. Quien dixo que mos morremos dua beç? Morremos-mos als cachicos, carolo a que l tiempo saca las forfalhas. Culas purmeiras augas sálen a bolar las formigas d'ala i la paixarada senta-se a la mesa de l formieiro, ls pelhiços assóman sue risa castanha, píngan ls trampos, pulas fieiras de galhos arrefucidos ban-se atrecindo figos que rejistírun al amadurar: cula lhuç, ls dies abáixan la lhadeira, muito custa a albantar ls uolhos quando até l cielo s'arranou, mais pesados ls passos pula lhama que se mos fui agarrando an puolo. Son un zaspero las purmeiras augas, tenhindo cun sou oulor a muorte l tuoro de ls jacarandás, ampeçando aqueilha caminada an que todo se buolbe para andrento pa se salbar de las airaçadas, an que todo se ancuolhe até al alrobés, i las pingas gordas dreitas se sténden cumo dientes a peinar l runquido de ls altemobles. Las rosas assóman-se a la cara, l rosa slúbia pula raíç de las unhas, assi i todo zlhabado por bergonha deste friu andeble, de anzonar, ancapaç de cortar la respiraçon i arrepassar la miolha de ls uossos. Tengo siempre de asperar la nuite, alta, i l angarrar de l silenço: chamo-lo, scuolho-le las palabras mais calhadas, que le quádren bien, i pongo-me a ouliar puls sous beneiros até que la quelor de la boç s'achegue de l abandono de las zoras; apuis, ancosto la sonheira a ua squina i chamo ls dies que nunca hei de tener.