Assomadeiro9

Quando me quiero assomar a las palabras, tengo purmeiro que las çcascar pa que le puoda sorber l oulor, sentir la calor de l sangre, ber cumo céçan, oubir cumo respíran, ampalpá-le la redundeç de ls sentidos. Las palabras déixan-me l palpitar an suspenso, persíguen-me até la nuite an cada die. Cumo ls búzios tráien l mar, tráien las palabras l tiempo preso cumo se fúran bidas que até nós stendírun sous filos d'aranheira. Hai palabras que nun se déixan ber, quedadas yá fuora de l tiempo: hai que le sfregar l sonido, puxá-le pula quelor, atirá-las acontra las cousas que un die quejírun dezir, poné-las ne l almairo cun que speramos ls dies: nun hai palabra que seia melhor assomadeiro que aqueilha a que le lhimpemos las alas pa bolar. Inda que tenga un bolar malo, siempre bater las alas ajudar l renobar de l aire.