Milagre

Hai testos de l seclo XIII que fálan de la Tierra de Miranda, cun donaciones de tierras als frailes de Moreiruola para ir pa l cielo. Stan screbidos an sturlhionés i nun fúrun screbidos por mirandeses, mas por frailes de l mosteiro de Moreiruola: cumo habien de ls screbir se ls mirandeses nun sabien? Tamien nun percisában, que la sue boç chegou até nós nua lhéngua quaije armana a la desses decumientos. Ua pessona fala i l sonido de sue boç pouco mais dura que uns segundos. Anton cumo ye que la fala daqueilha giente inda ressona yá arrimado a mil anhos? Solo puode ser por milagre... dessa giente.