Ua beç un galho, inda nuobo, andaba a scarbar l suolo an pie duas pitas i, nesto, zanterrou un diamante. La piedra relhuzie al sol i el lhougo biu l que era. Mirou bien para aqueilha piedra, meneou la cabeça i dixo: «Si sós mesmo bien guapa! Se eiqui stubira un ouribeiro i te bisse iba a quedar mui cuntento. Mas, para mi, nun bales nada. Mais quiero un grano de cebada do que todas las jóias de l mundo.»
Porqui se bei cumo ye amportante un saber l que quier i nun se deixar lhebar por cousas que muito relhúzen mas solo sírben para anfeitar i pa la baidade.
Mais gustarie de sacar la licion de que aquel galho nun era capaç de apreciar la beleza – até puode ser la beleza dua fábula - i que eilha puode até ser mais amportante do que todos ls granos de cebada de l mundo. I ten que haber un tiempo para apreciar ls diamantes i ls granos de cebada.
(Fábula de Eisopo, amanhada i cun ua nuoba licion acrecentada a la de Eisopo)
Sem comentários:
Enviar um comentário