Trigo i centeno

Sacado dun testo, a modo diário, screbido ne ls anhos cinquenta de l seclo XX. Esta parte (yá ye la segunda) que a seguir publico respeita al die de hoije, 15 de Agosto. Quando you era garotico, hoije nun sei se inda ye assi, íbamos a lhebar ceticas de grano a Nuossa Senhora i a San Roque, de que las eimaiges éran puostas a la puorta l'eigreija. Las mais recomendában siempre als filhos: dás-le l trigo a Nuossa Senhora i l centeno a San Roque. Anton, ye assi l testico, a que le chamo La Belheç:

«Ls garotos nun páran de passar culas ceticas chenas de grano: trigo pa Nuossa Senhora, centeno pa San Roque. I inda dízen que ls santos son todos armanos! Se calha, Nuosso Senhor fizo cielos de trigo i cielos de centeno...
Cumo ls santos, las pessonas nun son armanas. To ls santos son santos. To las pessonas son pessonas. Mas nada ye eigual, nin ne l cielo. La deferéncia ye tan galana cumo la bida que muda al çpertar de cada die. Solo porque çperta.
Mas quien puode scolher bibir nua trigueira ó nua centenada?»