Streilhas éntran puls uolhos i deilhes sálen al cerrar, perdido talbeç sou cielo, frauga que an sues chiçpas se çfaç; un ferbor na cabeça que duol ne l scachonar dua auga que nunca se chegou a formar; l cuorpo, perdido, acende poços al caier por el abaixo; l tiempo parou cumo ua piedra, i quando mira al para trás nunca eisistiu; ua quelor de grima abaixa cula nuite i çpindura ls suonhos que se pérden cumo óndias redondas d'auga apedriada. Paisaige biba, quadro de Dali que, sien resfuolgo, se slúbia pa l branco adonde nace l nada. Ende, torna a ser l lhugar de l rostro sereno, yá squecida la tortura de caminos de que nien quedou ua pisagada. Se eilha ls lhembrara çcribirie las paisaiges de mundos outros, tesos cumo suldados na parada. Mas quedou-le ua canseira sien fin que solo als poucos la deixa assomar i reganhar gana de l mundo de adonde nunca chegou a salir.
Fracisco Niebro
Sem comentários:
Enviar um comentário