Paisaige3

Stiaba a la selombra de l camino, stendido cumo retrato a negro i branco. Al lhado, l fol de la gaita salie cumo penheira de l munton, mas sonaba cumo un milagre, l ronca siempre a el preso cumo braço. Ls pelos de la barba éran ralos cumo ls pinhos adonde l cabeço botaba sue crencha, i ls uolhos dues ourrietas cul sol a pique i un relhumbrar triste. De ls dientes solo un quedara, negro pedamiego a aguantar l cielo de la boca, que até ls mais dóndios regoixos caçuában del. Ls rieiros de la cara éran mais que an lhadeira spechucada por truniada apuis de sementeira, nun fura la melma que se s'acamara i le ponie la teç a relhuzir cumo un bienabienturado an sou altar. L bezerro de ls çapatos retrocie-se cumo scultura delorida a deixar l dedo grande assomá-se pa la tierra que nada querie cun aquel Juan i menos culas modas de sue gaita.

La prainada stendie-se cumo cielo nubrado a alhargar l sboleixar de ls farrapos adonde l aire le custaba a acertar ne ls buracos, tan fuorte era sou tembraduro a la bista daquel mundo fuora de l mundo. Habie de chegar a la aldé, mas solo quando yá nun aguantasse l rugir de l stómado, que era siempre cedo pa las subelas de caçuada, era siempre cedo para dar de caras cun un mundo tan boubo que até a el l agarraba por boubo.

Un airico albanta un puolo burmeilho ne l camino, lhebe cumo ua renda, a apagar las pisagadas de l tiempo antigo, que yá nien el mesmo sabie quien era. Siempre soubo que nun habie outro remédio senó cuntinar al palantre, pula sola puorta de l tiempo siempre abierta. Boubo el... i daba-le aqueilha risica que siempre le fazie cuçquinhas ne l diente que quedara.

Fracisco Niebro