L Mais Alto Cantar de Salomon (VI)

Ye la boç de l miu amado mirai-lo
ben atalhando puls montes
als brincos puls cabeços
l miu amado ye armano a la cabra muntesa ó al benadico

ende stá atrás la nuossa parede
assoma-se a las jinelas
spreita pulas frinchas
fala l miu amado i diç-me

alhebanta-te mie amiga galana mie i ben acá
nun bés que yá çcampou
i l eimbierno passou
yá ban borreçudos ls botones de las froles

ye l tiempo de las cantigas
yá pul termo s’oube la boç de la rola
ls figos arrebéntan na figueira i scachou la uba an frol
alhebanta-te mie amiga galana mie i ben acá.