De cabeça atada

(Diário tardiego dun fumador an suspenso 3)

Stá biba la lhembráncia de ls géstios, de l gusto, de l tiempo, de l sítio, mas yá nun se me lhembra l anho an que fumei l miu purmeiro cigarro. Acabou por ser cousa pouco amportante, de modo que nun tenie reserba para quedar na lhembráncia i acabou por se apagar nua altura que tamien yá nun me ben a l’eideia. Talbeç haba sido ende por 1968 ó 1969, nun sei al cierto, mas era por esta altura de l anho, nua primabera caliente de Bergáncia, cul cielo tan claro que daba bien para ber la Senábria inda cun niebe. Sei que nun merquei esse purmeiro cigarro, que inda habien de passar muito anho até se dar l causo, mas talbeç un colega chamado Fernando Gouveia, que nun tornei a ber apuis de haber deixado l seminairo, yá bai caminando para quarenta anhos. Fumar era mal bisto ne l seminairo desse tiempo, mas nó proibido, que habie padres que bien ls çtripában, mas fazien esso meio a las scundidas. Cumo muitas outras cousas, podie-se fazer, çque nun fura a las claras i nun fúramos bistos, pus habie la cultura de que hai cousas que nun cumben fazer a las claras: cumo ls pecados que se fázen i se cunféssan an segredo. Abri la jinela de l quarto – yá dous anhos que tenie un quarto solo para mi -, i acendi l cigarro meio a miedo, sien puxar cun fuorça al para andrento que bien habie bido alguns a angasgar-se cula fumarada gulosa que angulhírun lhougo a la purmeira. Assi, cula jinela abierta, l fumo salie para la rue i nun se sentie l oulor ne l corredor subretodo porque habiemos (lhembra-se-me que éramos trés naqueilha funcion, tal i qual cumo las cumadres de la Çarandelheira) puosto ua toalha húmada por ambaixo la puorta a tapar algue frincha. Era todo al alrobés de quando oubiemos l Rádio Argel, a las bezes a la nuite, cun un filo atado a la torneira a fazer de antena. You tenie ua cumpleta falta de jeito para aqueilho, nien sequiera me astrebie a botar fumo pulas narizes i fazer bolicas nien pensar, que esso era yá cousa de porfissional. Quedou-me fraco gusto daqueilha purmeira beç i apuis, tamien, l denheiro era cousa que nun habie para nada a quantas mais para cigarros. Si era berdade que fumar era ua seinha fuorte de mancipaçon pa ls moços daquel tiempo, subretodo caien bien aqueilhes géstios de agarrar l cigarro i botar l fumo, que tamien aparecien cumo seinha de sucesso, parecie que fazien las pessonas mais felizes i, subretodo, éran muostra cierta de giente crecida. Se todo esso era berdade para qualquiera moço desse tiempo, muito mais berdade era para un moço que andaba ne l seminairo an que la cousa tenie l gusto doble de ser própia de giente grande i de tener que se fazer a las scundidas nua situacion an que era proibido sien l ser. Quando habie la possiblidade de salir de l seminairo, cumo quando se iba de férias, naquel cachico de lhibardade antes de agarrar la carreira, l que se fazie? Aqueilhes que podien, gustában de passar pul Chabe d’Ouro ou outro café assi a tomar sou café ou laranjada i fumar sou cigarro, eilhi cumo giente grande i sien que naide le podira ir a la mano. Géstios que solo por eilhes mesmos dában para antender todo l que pensában ls mais de ls rapazes que andában ne l seminairo i quanto a l’antencion que cada un tenie de ser cura. Ls padres sabien esso, mas deixában andar, yá que habie que mantener aquel grande coleijo a funcionar i apuis siempre habie la possiblidade de íren demudando cul tiempo. Nunca ls curas habien faltado, mas las cousas ampeçában a quedar cumplicadas pus nunca la cidade habie tenido tanto studante i tanta rapaza guapa cumo naquel tiempo i la telbison iba amostrando muita cousa que datrás se passaba ua bida sien sequiera manginar que eisistien. You debie de ser algo stranho, a la ua nun podie salir a la rue ne l tiempo de irmos a las férias que l carro de aluguel mos iba a agarrar mesmo a la puorta de l seminairo, apuis aqueilha spréncia de fumar l purmeiro cigarro nun me dou qualquiera eideia de haber quedado crecido i mancipado, antes me fizo bolber mais contra ls fumadores. Yá nun sei bien porque me bolbie contra eilhes, que nesse tiempo nun se falaba tanto de que l cigarro fazie mal a la salude, talbeç fura de you antender que esso era cousa de giente fraca, pus nessa altura defendie l’eideia de que l querer todo podie i you fazie apostas cumigo mesmo a ber até adonde era capaç de lhebar l querer para bencir l que para outras pessonas era ua cousa normal. Mas cul cigarro nun fui perciso poner muito querer, que la gana de fumar morriu-se-me por eilha mesma sien chegar a ganhar fuorça, inda que muitos hában amostrado de modo bien claro que nun querien ser curas al fumar l purmeiro cigarro. Suonhos que l fumo fui ajudando a ganhar cuorpo i lhebando cun el.