L quei son boubadas?

Ye boubo quien faç poemas,
quien nun ls faç mais boubo ye:
se stamos mal cun poetas
sien poetas que serie...

Quien nunca boubadas fizo,
nunca boubadas aceita:
mas l mundo que demunda
sien boubadas nun ageita.

Chameste-me a mi boubico,
mas tu metiste-me pena:
quien siempre a sério se lhieba
até le faç mal la cena
[bariante1: acaba nua cadena]
[bariante2: nunca a ser feliç se strena]

Sei que çprézias las eideias,
cumo outras cabeças uocas:
cumo has de filar la lhana
se çprézias quien faç las ruocas?

Cula barriga tan chena
de tue altiba rezon,
has de quedar smirradico,
que rezones nada son.

Andas mui anrabiado
por algo que nun te fiç:
mas fuste siempre lhebado
por outros ne l diç-que-diç.

Quando me calho ye porque
falar-te guerra darie:
al menos siempre me queda
l poder falar-te un die.

Quando naide quier de naide
nien dar nien saber amboras,
nun gustas de oubir cantar
que an beç de cantar tu choras.

Fonso Roixo