Quadras

Altemobles na cidade
nunca páran to la nuite:
quien sossegue assi nun hai,
nun hai quien l sereno scuite.

Quando l doutor me scuitou
pul miu mal passou de lhado:
tengo un mal que naide l oube,
si fala, mas stá calhado.

Bai-se l pelo sbranquenhando,
yá mal me conheço al speilho:
marcas de l tiempo, que naide
l'adomina i mete al reilho.

Quando fumabas, tussies,
maldito i fuorte l catarro:
nun fumas agora i inda
dá jeito acusar l cigarro.

Todos te quieren, que muito
le puodes dar a cada un:
se esses bienes nun tubiras
nun te mirarie nanhun.

Bien giente nace pul mundo,
mas tu cun pouca te dás:
quergas ou nó, ye na tribo
que cunfias i onde stás.

Na bielha Grécia, ls sabidos
sacában filosofie
anquanto íban de camino:
eiqui you deixo la mie.

Tanta carta que screbi!
Bien asperei pul correio!
Agora, bou-me al e-mail
mas çcunsola-me l que leio.

Bien amboras cada die
mos tráien de l mundo todo!
A las bezes gustarie
De las cuntar doutro modo.

Fonso Roixo