Lérias nun adúban sopas...

Dízen: lérias nun adúban
sopas, que nun bálen nada;
mas essa ye la repuosta
a quien querie ber calhada

ua palabra certeira
i queda sien argumientos:
el hai palabras tan fuortes
que mais quéiman que pumientos!

Hai siempre un dito a la mano
pa dezir todo i l cuntrairo:
son beleta que a to l aire
se buolbe ne l campanairo.

Quien bien las palabras usa,
yá ls feitos que diç ampeça:
nun hai feito de balor
sien que palabra l sclareça.

Por esso bal mais quien fala
bien, do quien al calhas faç:
pus quien nun sabe dezir,
fazer bien nun ye capaç.

Por esso mais quiero sopas,
d'adubo cun buonas lérias,
que outras cun pingo rancioso
feitas por gientes nun sérias.

Fonso Roixo