merquei tapones pa ls oubidos

fui la muorte doce por un outro camino

i agora quieres tornar al ampeço mas bien

sabes que nunca tornamos al ampeço puis solo

palantre mos lhieban nuossos passos i nada

mais que selombra mos atira al para trás

nien te deste de cuonta que perdiste

l arrebentar de la fuolha l amberdecer

las arbles salidas a aplediar por froles

antoce tenes tu que çcubrir adonde te lhebares

an que nabiu ambarcar que puorto buscar

l mar esse stá andrento de ti rebuolto peligroso

lhargo cun sues serenas i sous mostros malos

i bien bés acabeste por nun daprender a nadar

cumo debe de ser: pássan por nós ls rius mais fondos

i l mar que somos nunca naide lo atrabessou

buono, talbeç seia possible chegar a la Índia

ne l mapa an que te bás fazendo mas naide sabe

bien te digo: puodes adominar ls aires acradita me

rejistir le a las termientas salbar te de ls bulcones

i tapar le ls oubidos a las serenas que te pérden

tócan sue fraita ls uolhos pulas rues sien naide

l aldé deixada a la soledade de la proua colgada

de ls carbalhos las nueiras a amaçarocar ne l milho

mas solo la palha traíste cuntigo i para ti solo

un nuolo quedou un baziu un miedo ua pantasma

que cardumes t'atrabéssan l silenço que corrientes

te lhieban por cidades perdidas ancantadas?

para mi merquei tapones pa ls oubidos al modo

para nun oubir serenas que tamien tengo un mar

a atrabessar i nun me hei de perder por sous (an)cantos

Cartas a Lucílio

dues pilhas de lhibros son mies centinelas

ua de cada lhado de mi i dalhá la jinela

achega se la nuite i nun hai meia de chober

la cidade cansada cula abertura de ls telejornales

i you sentado a mirar l mundo alheno, tan alheno...

se tubira paç i tiempo al modo, era este un sítio

adonde poderie screbir mies Cartas a Lucílio,

mas queda loinje l riu i nun hai meia de dar

culas frinchas por adonde spréitan las streilhas

nien sinto fuorte la cuntaije decreciente de ls dies

talbeç nun tenga grandes cousas a dezir i a naide

han de antressar essas cartas, anquanto i nó

bou me perdendo por mercados i spitales

que nun hai cumo atamar un delor c'un bun

cheiro a bida i ber giente cuntenta por mercar algo

inda bien que solo me beio l pelo rúcio al speilho

nien sei cumo parece quando le bate l aire

assi siempre le puodo dar algue amportança

a las eideias que sálen de la cabeça que el acubre

- mas nunca las nuossas eideias ban alhá de nós

anque muitos deilhas quérgan fazer berdades

cumo se naide mais podira tener las sues:

agarra las tues berdades i se las sacares doutros

solo bálen porque las faziste tues i mais

crédito nun ténen do que a ti mesmo te dás

cánsan me las eideias que carrego i nun hai

modo de me ber lhibre deilhas, puis nun se déixan

quedar agarradas al papel i solo you

tengo l ser que las faç bibas: son tanto de quien

pensa las eideias cumo de l biajante la biaije

talbeç nunca chegue a ir a la Índia i mie Ítaca

queda para outro lhado, mas inda me falta

çcubrir cumo hei de dar cun eilha i, mal chegue,

saber que a eilha cheguei: nun ha de ser la fin

que un caminante nunca le rejiste a mais camino

stou de cuostas buoltas pa la nuite i chega me

l abraço dun retombo, talbeç un altemoble

al loinje, talbeç un aire a spertar suonhos:

da me la mano un carreira de palabras lhibres

i manhana hei de tornar al rame rame de ls dies

adonde todo ye tan pequeinho que naide

dá por esso, tan pouco amportante que solo

nós del dependemos: i bou repetindo esta eideia

a ber se me cumbinço, anquanto bou cultibando

géstios, risas, passos, falas, cumo nua huorta.

las bezeiras de Circe

era guapa Circe i sou palaço

de cantarie lhabrada cun lhargas bistas

guardado por lhobos i lhiones

ambruxados pula diusa cun sues yerbas

Circe diusa de guapas tranças i boç

siempre tecendo sues lhuzientes telas

quien le poderie rejistir a sous ancantos?

tamien als sfamiados cumpanheiros d'Oulisses

le dou sou queiso, sue branca cebada i sou miel

cun bino ambuolbo an bruxedo malo

i quando la diusa le topou cun sue bara

lhougo eilhes se bolbírun an cochinos

mas, maldiçon suprema, cuntinando a pensar,

dando le la diusa de cochinos la bianda

i eilhes stiraçados an sue própia merda:

querie Circe que nun lhembráran sues tierras

i nun quejíran mais saber de sue giente

- tan guapos son ls ancantos de l squecimiento! -

quando Oulisses ls lhibartou, un choro

de suidade abaixou porriba deilhes

que até la diusa quedou penerosa cul retombo

eilhi passórun un anho ambelados pula diusa

quemendo i buendo de l melhor

i solo apuis bolbírun a casa, apuis de habéren

passado l Hades - ye de muortos la tierra de l squecimeinto -

mas era para casa que bolbien, pa la giente

que los criou cun sou canto, sue lhéngua, sou pan:

quien ye capaç d'aguantar ua bida nas bezeiras de Circe?

[anspirado na OUDISSEIA, de Houmero, Canto X, 210-574]

queda mos mui caro l tiempo

quando quedares bielha has de tornar

a la cadeira de baláncio i seguir nua risa

ls zeinhos cun que ls páixaros cumpónen

sou bolo a sticar l lhençol de la selombra

pula tarde berde a bolar an tou pelo rúcio

has de mantener l lhibro cerrado antre

las manos anquanto sacas cuontas

de las lhembráncias que bénen chubindo

la lhadeira i deixas l milho crecer até

te perderes ne ls oulores ninos de la folhaije

talbeç gustes de te dezir cumo passou delgeiro

l tiempo nun tubira sido tan custoso i lhargo

mas yá todo angulhiste i sereno torna

agora que pouco te deixou cun sue fame

sien fin tan altos juros te quebrou pula bida

deixa te quedar an tou baláncio esse modo

que tenes de le dezires si nun sabes bien a quei

este fui l sfergante que sonheste un die

mas falta tanto tiempo inda que tenes de

cuntinar a sonhar que mos queda mui caro l tiempo

nun te scondas ne l suonho

sonha siempre mas nun te scondas

ne l suonho nun te quedes nel

que nessa tierra nun fázen niu

ls páixaros i nun cuorren ls cardos

ls caminos adonde has de ferir tous pies

la tierra de ls suonhos ye para cunquistar

an guerras de delor i sangre

nó para bibir cumo quien se muorre

ou quien deixa acender l miedo ne l sangre

i guarda l bibir para dies tardiegos

mira bien de frente nien que ls uolhos céguen

que ye agre l sudor l delor l tiempo

i l suonho nada mais que carro seia

talbeç albo adonde apuntas tues frechas,

mas bulhiçca te até te respunderes: stou bibo, que milagre!

buscas un rinconico

dá la falta d'auga até para secar raízes

márcio cara de lhadron squecido

de las porrascas de las airaçadas

a poner ls galhos garbançudos

arrebentando an polhas abanando

pítulas cun sues muostras de fuolhas

i buscas un rinconico de mundo

adonde crecer puodas lhibre de miedos

nun te dás bien de cuontas mas nun hai

adonde un se scunder del mesmo

nun sabes que te fazer i apledias

por remédios a que le pones la culpa de todo

porquei te quieres ir ambora se nun hai campo

adonde l aire nun puoda ser ambenenado

pula cuçpinha que bótan ls mirares

i las risas se déixan smagar puls altemobles

sabies que habie lheirones ne l jardin

a quemer ls restros de ls caixotes de l lixo?

has de abaixar pula lhadeira i oubir l cascalhar

de l'auga quando chobir i las laranjas

hah de te botar risadas de çumo cun lhagarticas

a las horas roixas has de te tapar cula manta

de l camino i nunca te squecerás d'acender

la candela dua flor la bela dua lhembráncia buona

stan cumo tu ls mius poemas bien bés

que nun dan cousa cun cousa a hora de meidie

yá bai a passar l doutor que ban a ser las dieç

i ls filos de l soro son benas brancas

cun gana de se scapar de l cuorpo

siempre a pingar neste márcio seco i boubo

lhembras te de quando tocabas la campana

para chamar a scuola i ls romanos eilhi

al lhado a sacar ouro an Jales i l renault 4 anterrado

ne l lhodo lharga ye la sierra de la Padrela

i nien un germo pul camino ls gatos a spera de guisado

i l mundo tan loinge que nien se bie al loinge

agora quedas antregue al silenço caliente de ls febres

anque te sonhes ne l silenço de la prainada

na risa de l riu adonde un die sonheste tues cinzas

i nós a passo pula rue siempre an frente

que nun hai tiempo para paraiges ou perder l tino

a spera que passe hoije i cólguemos de manhana

las cantigas a la falta de salgueiros i de riu

a la falta de lhinha adonde pescar

puodamos gana para dies sien fin

biste l'agonie de las piedras zgraniçadas?

antoce deixa que passe la termienta

que la tierra inda spera outra ceçon

bá anima te por que te habies d'animar

se siempre stubiste animado

i ls dies camínan porriba las nubres

que mal dá para aguantar l bruído

de ls passos na tierra i sigues sigues siempre

que alantre tamien puode ser al para trás

ye siempre agora

lhebórun trés bifes de cad'ua

ambaixo la puonte fázen

bolhos pula nuite ls scrabos

cun sous amos chinos torturando

i chube mos la gana dua fugida doce

que nunca zaparece i nunca ben

eisísten ls paraísos i son berdes

cun sous pequeinhos rius

cantantes paixarinas

a lhebar las arbles an sous bolos

fuortes son las cadenas

que átan manos i pies

i nada podemos fazer para

alhá dua risa angulhida a meidie

angulhida a la nuite nun para de chober

eisércitos de suldados se úpen

de las quatro squinas de l mundo

prejoneiros de sues guerras

hei de tornar sien çcanso siempre

até le abrir la puorta al die

ou que la nuite zista de sou bózio

nien sei se hai manhana ou purmanhana

mas hai agora i ye agora siempre agora

que se puoden fazer ou çfazer mundos

un delor de fuogo

quando se perde l mirar ampeça l bolo

rente al branco de l hourizonte perdido

i ye l çponer de l sol un delor de fuogo

atiçado acontra las lhembráncias

que un die deixei colgadas de l tou nome

spero agora la cumpanhie de las arbles

adonde dan frol las benas de l camino

i quando abri las manos ua fuonte

na punta de l dedos gargalhou

pula rue fázen caçuada las státuas de poetas

stende l friu sous filos na prainada

nun cabe la soledade ne ls cabeços

mas nun para l camino nunca acaba

i l páixaro de ls uolhos chama nuobos dies

cun sue cantada de lhuç i de frescura

dou me par'ende

da me agora para screbir poemas

que mal chego a antender

las palabras an sobela spetadas ne l pensar

déixan me sien casa

i la foia de las horas queda a arder an claro

que puoden las palabras adonde

relhúzen fames i l perro de la soledade

até le ruobe al die ls uossos?

porquei habien de fazer sentido

las palabras ls poemas adonde l mais nun l faç?

lhadra na nuite l perro de l poema

i pregúntan: porque nun se calha?

cuitado, yá dou an boubo que

nun diç cousa cun cousa:

mas para que sírben poemas que nun son boubos?

l tiempo ajunta la lhiteratura

cumo l camino l puolo

apuis de l sfergante an q'arrebéntan las palabras

cuntina l poeta perdido n'alto mar:

a que outra traba se poderie agarrar?

l puolo que s'agarra a las risas

son agres las horas

an que te buscas

derriado de preguntas

i nada dízen las palabras

respiro de diuses

que nunca fúrun justos

muito custa a sacudir l puolo

que s'agarra a las risas

afeitas a camas de silenço

pouso ls uolhos anriba ls dies antigos

andebles quédan ls passos

i ouxados flúren ls suonhos

quier l poema fazer de cuonta

que la muorte nun chegou

a benir ne l ajuntar de ls cacos

ha de cun márcio benir la primabera

han de nacer nuobas pítulas

mas nun s'acende l berde nas rabeiras

que adelantra star feliç l die?

era un die feliç

atrabessado de selombras,

friu cumo ua andefréncia

era un die feliç

staba eilhi a la mano

mas naide daba por el

era un die feliç

- ls dies nun son felizes, deziste

son dies i nada mais

era un die feliç

porquei habies tu de star feliç

se la felcidade nun s'apega?

era un die feliç

cun sou claro sol de primabera

mas esso de nada te baliu

porquei buscas dies felizes

se nien sabes cumo

bai a ser manhana?

scribes poemas

mas nunca cuides

que mánan felcidade

bolho de l caco surrialista

salien te las palabras

cumo fuonte an primabera

an que l manadeiro

nun le dá aguanto a l'auga

i l aire las traie de mundos stranhos

chubidas an sues alas brancas

sien çtino nien paradeiro

an que todos ls sentidos se mistúran

pousan te ls uolhos

an mundos que naide fizo

adonde nunca bibiste

i nien manginas cumo alhá chegueste

surrialista l çcurso

adonde todo l sien sentido faç sentido

tal i qual ua cabeça que bolho de l caco

se debelga de sous pochos oulores

Ariane te faziste sien que l filo

te ajude a salir desse mar

a que apuntas la quilha de ls ombros

sous remissacos oupidos

ne l baziu de ls géstios

nien ua lhágrima arrima agora

al sbranquenhado de la risa

que te lhieba de ti an claridade

que amporta que nada desto faga sentido

se ye sentido que bonde star eiqui

i l scachonar de las palabras cun sue scuma

le ansina al riu l sou camino

dies de l bózio

las nuites scríben a branco

la perséncia de quien falta

afazes te a ler alhá las letras

nun cabes ne l campo que datrás sobraba

puis bai la soledade muito

alhá de las medidas:

para quei un die de la mulhier?

porque nó séren todos

dies de l bózio

que chame la denidade por sou nome

i mantenga acesa la chama

contra ls silenços assacinos?

tenies l pelo seco cumo

rumiacos na ribeira que nun cuorre

las palabras perdidas an sou bolo

sien la ceçon que ben culas lhágrimas:

nun ye inda l tiempo de la cinza

poner sou luito na risa de l riu.

spera

pouco mais me quedou que

l febre dua spera

ua raça de sol arrochada

antre l frisgo de ls beiços

dezertos agora de palabras:

nada que fura capaç de l bózio

que t'atrabessa l cielo de l silenço

ruoben la nuite

ruoben la nuite ls uolhos

cerrados menos pa las lhágrimas

que de la cara fázen morredeiro

assi ban se afazendo al die

quando spertáren

pranto

nunca que bonde has de chorar

l scochar de las pítulas, anque

andebles, deloridas, puis nun hai

milagre mais grande que bibir

deixa

deixa que l tiempo arda

sien fin cumo ls caminos

nun te busques que solo

an ti te scondes i te perdes

deixa rojar l'alma que na calentura

lhágrimas seran oupor que naide bei

dies redondos

puls dies redondos

nien las horas s'astríben a passar

ou ua raça d'aire s'anfunisga:

respira se a poder de streilhas

i drume se nun retombo de mar loinje

l pensar a salir dun formieiro.

óndias ban i óndias bénen

quando l mar se stiraça pula ourielha

yá perdido de l mesmo

dízen bielhos marineiros

que nun torna a ser l mesmo

nunca mais: na paç de ls çtroços

deixados an pantasma pula arena

solo macabras risadas de sirenas

s'óuben inda, que sou canto

talbeç nun percísen yá de oupir:

i tu quedas a mirar l hourizonte

sien que ls uolhos puodan

alcançar l mastro dun nabiu benideiro;

mas de mirar nun deixas

que talbeç seias tu mesmo

por quien speras, al fin:

óndias ban i óndias bénen

nun puode l mar deixar de ser quien ye

i ha de un die traier te (outro) an outras óndias.

alas

deste le alas lhargas al silenço

i agora nun hai meia de chamar la lhuç

l sereno zaspero

nun ye paç l sereno

quando se buolbe

an preguntas sien fin

a que naide ye capaç

de le dar repuosta:

nunca me habie

dado de cuonta

cumo puode serenar

l rugido de las termientas

cun sues çcargas de miedo;

quedeste ne l cielo

de l'andefréncia

alhena als delores

an suspenso, quelorada

cumo se nada se passara:

mas todo ye al alrobés

de l que parece

la spera oupida an sol

sien colgadeiro l tiempo: cumo

quedar de pies nesta pequenheç?

nunca solo

nunca has de saber

quantas lhuzes t'alhúmbran

l camino, que fuorças

l manténen bien abierto;

nunca cuides que

para andar te bóndan

solo tous passos

ou que tues fuorças

solas guárdan ls miedos:

nun fuste tu que faziste

la nuite, nien solo

lhuç bota tou sol

por bien que alhumbre;

bien que bibas

nun acabas

de ls cachicos que

te fázen ajuntar:

busca de ti mesmo

nunca acabada jeira.

nun hai camino al para trás

que píden tous uolhos

perdidos

sentidos

calhados

que dízen tous uolhos?

que scríben tous uolhos

na fuolha

abierta

ne l talho de l die?

ansina me a ler

ls scritos que miras

mirares que scribes

nun cerres tous uolhos

assi yá

nun leio

assi yá

nun beio

i perdo l camino

se cerras tous uolhos

sou you quien

nun bei

sou you que

me perdo

sou you que

me cego

se cerras tous uolhos

tous uolhos perdiste

nun sabes adonde

perdiste te neilhes

deilhes me perdi:

que adelantra

candeia

buscá los

chamá los

chorá los

s'apagórun

l camino

al para trás?

abre solo

ls uolhos

nun te cegues

contra la parede

de l tiempo:

nun hai camino

al para trás

bielhos ou antigos?

Hai uns dies falaba se na 1.ª páigina dun jornal de bárias pessonas cun muita eidade. Ua deilhas, cun mais de uitenta anhos dezie: sou algo antigo, mas nun sou bielho. I you pregunto: que ten la palabra bielho i sous deribados, cumo belheç, que las pessonas le fúgen cumo tinha? You siempre oubi chamar antigos a las pessonas que yá stan muortas, que bibírun ne l passado.

Quando somos garoticos chega un tiempo an que yá nun aceitamos que mos chámen de garotos, ninos, meninos, crianças, mas esso nun quier dezir que nun lo séiamos. L mesmo se passa cun las pessonas de eidade, que nun acéitan ser bielhos, mas esso nun quier dezir que nun lo séian. Ser bielho nun ye zonra, nien deminuiçon, ye solo ua question de eidade.

Siempre assi fui i ha de cuntinar ser. Antoce Cícero se screbira hoije l sou De Senectute (De la Belheç) tenerie que screbir De Antiquitate (De l'antiguidade)? Nun passa de jogar culas palabras i de mos anganharmos, mas esso ten ua cunclusion mais peligrosa: cumo nun aceitamos ser bielhos, antoce hai que negar que haba bielhos ou hai que ls scunde, l que ye terrible.

Bendo bien, cuido que ua de las percipales seinhas de belheç ye nun aceitar que yá se ye bielho. I nun hai naide mais bielho do quien nega siempre que lo seia ou puoda ser. Neste tiempo an que solo se le dá balor a la mocidade i se busca la malzina de l'eiterna mocidade, la belheç cuntina a eisistir i l pior que mos puode passar ye fazermos de cuonta que nun eisiste. Quando mos benir nun la sabemos recoincer nien sabemos l que le hemos de fazer: puis bielhos nun son ls farrapos, bielhos son las pessonas.

floresta

tanta ambora se dórun hoije pul mundo

cousas terribles i até un prémio nobel de l'eiquenomie

que acá bieno a dezir mos que

ganhamos de mais

que bien, bien ye mesmo ganharmos menos

si, ganharmos muito menos i inda porriba

ye doutor por mais ounbersidades que you sei alhá...

assi i todo, cun tanta ambora, naide soubo

que te naciu ua tristeza fonda

i que l'arrimeste la an pie las outras todas

cumo ua floresta spessa i fuorte

assi quando le dir l aire

ha de chorar, anque todo mundo

nada mais ouba que cantar, quei ye cantar?

l que tamien naide sabe ye que

un die hei de chiçcar ua motossierra

i corto rente al suolo la floresta

i de sous tuoros fazerei rachones

al modo para lhume arder al modo

calcer risas i soltar l brinco de l die

tanta ambora pul mundo que hoije naide soubo...

porque será?

a las bezes ye tan rial l mundo

tan berdadeiramente rial

que passo l tiempo a oupir

i a lhebar al cuolho

ls suonhos siempre a tropeçar:

quédan me chenos de brechas

a las bezes sángran

puorcos zafigurados

que até se ri quien por eilhes passa

se nunca ls deixo morrer

porque será?

porque son suonhos

porque son mius

i bendo bien

nun tengo mais nada

nun sou mais nada

arte poética al alrobés

a yerbas, tierra, peinhas ou solo

auga a cantar na risa dun rieiro,

i a quei mais ha de dar l oulor de ls mius poemas?

siempre me boto a adebinar,

nien siempre acerto, mas ye peligroso

que me leias sien saberes l oulor de las palabras

sacadas desses campos adonde me bola l'alma.

na quelor, l poema, a todas subirte l negro

de gárrias crabiadas ne ls amarielhos de zaspero

que restroilhos golsiórun miles d'anhos a filo;

afuora esso, talbeç ls brancos de ls silenços sien fin

tamien s'acóquen a la briada de las palabras;

para bordon bonda la sue música, que sien eilha

nun hai modo de l poema achar camino.

inda un die hei de ser capaç de fazer un poema, hounesto,

que bote un oulor anquelibrado i miu

relhuza an quelores que lo lhieben a sous lhemites

todos nuas alas de música que nun hai meia:

inda un die hei de fazer un poema, berdadeiro,

redadeiro spurmentar desta scrita an que to ls dies

l mesmo, siempre l mesmo persigo i nunca agarro

nuolos

fórman se mos nuolos que palabras nun son capazes de zatar,

uas bezes música rebuolta que nien oubes

outras pregunta crabiada an modo spino

siempre ua fogueira adonde an claro ardes

sien que nunca te benga un die de cinzas

prende ls uolhos i senta te sereno alheno

cierto de que nanhue bista te puode de ti salbar

yá que nun sós para ansénsio a diuses que nunca fúrun ser

aferrolha las palabras antes de l manadeiro

que apuis de nacidas yá las lhiebas a las cuostas

nun deixes que t'anganhe l relhuzir de ls soles

nun bés que nien l mais fuorte de todos nun aguanta

sien ua nuite por die pa se scunder para scurcer

antoce por que habies de siempre tu brilhar?

la lhuç que botas ha de alhumbrar purmeiro tou camino.

mai

die d'anhos ye tiempo al modo

pa le puxar l lhustro a la bide

que mos prende a nós, colheira

siempre a guiar l camino de casa;

un die me cortórun ua bide

i dízen que naci, anque nunca

me soube outro; quando esta

me cortáren, ende será tiempo

de me lhebáren mundos,

de me morrer assi cumo hoije sou;

ye esse l drama de nacer: hai siempre

algo que ten de se morrer;

antoce, fazer anhos ye ua moda

que siempre outros mos cántan,

puis nunca para nós fazemos anhos:

nunca tous fúrun ls anhos que faziste...

guarda cuntigo

guarda cuntigo ls cachicos que de mi

lhiebas ne ls uolhos, anhos a filo ou solo

un sfergante sentados an tou cuolho:

talbeç que nunca ls aches, de perdidos,

ou quien sabe s'un die puoden ser filo

que al lhabirinto de ti te han de sacar;

se cuidas que naciste un die, yá loinje,

inda a cada die percisas de parteira.

l friu i la muorte

- hoije tenemos la muorte an casa -

deziste me, i a falar mal de l friu

passeste todo l tiempo;

- nun stranhes, la muorte bai se achegando

siempre, sien sítio para adonde scapar,

mas este friu trai me siempre gana de berano.

dá me ua risa

dá me ua risa, que faga

las lhágrimas que nun me sálen

acháren sou camino:

nun queda tan triste la tristeza

se la lhabas na lhuç

duns uolhos que se t'oufrécen

para ber doutra maneira;

dá me ua risa fuorte,

capaç de me çfechar las puortas

que este financeiro eimbierno

sien fin me bai cerrando,

tan pouco bonda para derretir

l calantriç ancuscarado:

dá me ua risa par'hoije i pa manhana.

dá me ua risa i te darei an drobo

apuis sou camino ache:

nun chores quanto dás

puis outro modo nun tenes

d'anchires tous bazius sien fondo:

dá me ua risa, que ourgente

perciso dua casa pa la mie!

l mielro

oupie se la manhana

i chegaba me pulas frinchas de la jinela

un cantar de mielro:

era la moda de la lhuç

atamando l bruar de l die:

que amporta se nun bieno l mielro?

hai ua música an ser,

tan lhibre que yá nun queda agarrada a nada:

ende me nace clara la madrugada.

Ls doze (06)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

06.

Outra beç s'achega l guiador de carruiaije,

bola, bózia, scarbalha...

Alto, alto! Andriukha, á que de l rei!

Petrukha, bai atrás del!

Ta-tarara! Ta-ta-ta-ta!

L puolo de niebe bola pa l cielo!...

L guidor de carruaije scapa se cun Vanka...

Ua beç mais carrega l gatilho...

Tra-tarara! Bamos le a dar ua licion,

.......................................................

l que ye andar cula rapaza de outro!

L canalha scapou se! Berás

cumo manhana acabo cuntigo!

I Kátia, adonde stá? Muorta la deixei,

cun ua bala na cabeça!

Stás cuntenta, Kátia! Nun se mexe...

Stá muorta anriba la niebe!...

Firme la passada rebolucionaira!

Nun çcansa l einemigo!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (05)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

05.

Ten ua seinha ne l cachaço,

Kátia, la seinha dua facada.

Ne l peito, Kátia,

tenes ua ounhada fresca!

É,é, beila!

Que piernas tan guapas!

Lhebabas roupa de rendas;

por que nó agora?

Fodies cun oufeciales,

por que nó agora?

Fode, fode!

L coraçon salta me ne l peito!

Lhembras te, á Kátia, aquel oufecial,

que nun se salbou de la nabalha...

Nun se te lhembra del?

OU nun tenes la lhembráncia fresca?

É, é, refresca la,

mete me na cama cuntigo!

Polainas quelor de cinza lhebabas,

i buies choclate,

ibas pa la cama cun cadetes...

Agora bás cun suldados?

É, é, peca, peca,

Bás a sentir l'alma mais lhebe!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (04)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

04.

La niebe rebufa, l guiador de carruaije bózia

cun Vanka i Kátia ne l trenó!

I na carruaije lhieban

lhinternas eilétricas...

Á, á, arre!...

Cul capote de suldado rasgado

ten cara de burro.

Anrosca l bigote negro,

truoce lo

i adbirte se...

Eiqui stá Vanka, de cuostas lhargas!

Eiqui stá Vanka, l lhinguarudo.

Abraça la tue Kátia, cumbince la...

Eilha bota la cabeça para trás,

ls dientes deilha pequeinhos relhúzen cumo perlas...

Á, tu, Kátia, Kátia mie,

bochechuda!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (03)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

03.

Assi ye la nuossa mocidade:

serbir na guarda burmeilha,

serbir na guarda burmeilha,

i perder sues cabeças boubas!

Á, tu, probe,

doce bida!

Dólman rasgado

i fuzil oustríaco!

Para que todos ls burgueses súfran,

botaremos le fuogo al mundo,

fuogo al mundo que naciu cun sangre.

Senhor, la tue bencion!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (02)

[Cuntina se la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

02.

Bola la niebe i passeia l aire,

I ls doze homes síguen.

Correias negras ne ls fuziles,

i alredror muitas lhuzes...

Antre ls beiços un cigarro,

l chapeu spetado

i nas cuostas un ás de ouros!

Lhibardade, lhibardade!

Á, á, ban sien la cruç!

Trá-tá-tá!

Faç friu, camarada, faç friu!

«Vanka stá cun Kátia na taberna...»

«Eilha lhieba l denheiro ne l miote!»

«Vanka ye agora rico...»

Era de ls nuossos i agora ye suldado!»

«Bamos, Vanka, grande çacana burgués,

dá le un beisico a la mie amada!»

Lhibardade, lhibardade,

á, á, ban sien la cruç!

Kátia stá acupada cun Vanka,

i stá acupada cun quei?...

Ta-ta-ta!

Hai miles de lhuzes alredror...

Nas cuostas la correia de l fuzil...

Firme l passo rebelucionairo!

L einemigo nunca se drume!

Agarra sien miedo ne l fuzil, camarada!

Bamos a çparar ua bala a la Santa Rússia!

La reacionaira,

la de las chabolas,

la de l culo grande!

Á, á, ban sien la cruç!

Aleksandr Blok, zde la traduçon pertuesa feita zde l russo por Manuel de Seabra [Poetas Russos,Relógio d'Água, 1995]

Ls doze (01)

[Eiqui s'ampeça la traduçon de l poema 'Ls Doze', de l poeta russo Aleksandr Blok [1880-1921], poema que ye por muitos cunsidrado ua de las obras primas de la poesie de l seclo XX]

01.

Nuite negra.

Branca niebe.

Aire, aire!

Nien un solo home s'aguanta de pies.

Aire, aire

por este mundo de Dius!

L aire faç boltiar

la branca niebe.

Hai cúscaro ambaixo la niebe lhebe.

Slúbios, pesados,

arrebálan ls passos

na rue... Á, cuitado!

Antre dues casas

stendírun ua cuorda.

I na cuorda un cartaç:

«Todo l poder a l'Assemblé Custituinte!»

Ua bielha chora,

nun antende l que quier dezir

aquel cartaç.

I porquei un cartaç tan grande?

Quantos miotes se podien fazer pa la garotada

que ten ls pies ancarambinados...

La bielha, cumo ua pita

scamujida, atrabessa un monte de niebe.

«Á, birge Santíssema,

estes bolchebistas bótan mos pa la foia!»

Aire que corta!

Nun aguantas l friu!

I un burgués nua squina

sconde bien l nariç.

Mas quien ye este? De pelo lhargo

i diç an boç baixa:

«Traidores!

Y la fin de la Rússia!»

Ye talbeç un scritor

ou un ourador...

I ende bai un home de saias,

sconde se atrás de l monte de niebe...

Porque stás hoije triste,

camarada cura?

Lhembras cumo datrás

andabas de peito salido

i la cruç te fazie relhuzir

la barriga als uolhos de l pobo?

Ua dama bestida de astracan

buolbe se para outra:

«I cumo tenemos chorado...»

Nesto arrebala

i - pumba! - cai se sparbada!

Ai, ai!

Bamos a ajudá la!

L aire stá cuntento,

cuntento i cruel.

Faç sbolaixar las roupas

de ls caminantes,

rasga, aperta i faç bulhir

l grande cartaç:

«Todo l poder a l'Assemblé Custituinte!»...

I trai mos estas palabras:

«...Fazimos ua runion...

...naqueilha casa...

...çcutimos...

i resolbimos:

Ir pa l quarto dieç rublos,

drumida binte i cinco...

... nun puode ser por menos...

Anda dende...»

Stá a quedar cun de nuite.

Queda la rue sien naide.

Solo quedou un pedinte

drobado

i l aire silba...

Ei, probe home!

Anda,

abraça-me...

Quiero pan!

I apuis l quei?

Fuora!

L cielo stá scuro.

Rábia, ua triste rábia

ferbe ne ls peitos...

Rábia negra, rábia santa...

Camarada! Queda

de uolhos bien abiertos!

Aleksandr Blok, zde la traduçon pertuesa feita zde l russo por Manuel de Seabra [Poetas Russos, Relógio d'Água, 1995]

que se m'amporta...

Las suidades de la pátria, que eilusion

hai lhargos anhos yá deixada!

Que se m'amporta a mi an que rincon

steia solica

ou por que streitas piedras de calçada

bou cun l saco de compras als quadriles

a camino dua stranha casa

que ye cumo ua caserna ou spital.

Que se m'ampórtan ls rostros ne l meio de ls quales

you puda bibir cumo un lhion rugindo,

i de que pobo me puodan spulsar,

que se m'amporta, pula cierta,

para andrento de mi?

Cumo un urso de la Kamtchatka sien carambelo,

para mi ye siempre armano

l lhugar de bida i houmildaçon.

Nun me gusta yá la chamada de l lheite

de la mie guapa lhéngua materna.

Que se m'amporta la lhéngua

an que nun sou antendida?

L guloso lheitor de jornales

I ourdenhador de diçquediçque

ye de l seclo binte

i you de todos ls seclos!

Marina Tsvetáieva, cun assento an traduçon para pertués zde l russo, feita por Manuel de Seabra [Poetas Russos, Relógio d'Água, 1995].

Para que me sírben ...

Para que me sírben eisércitos de modas

i l gusto de la poética sentimental?

Para mi na poesie nada ten amportança

a nun ser ls homes.

Quando soubires de que lexeira

sálen ls bersos, sien bergonha,

cumo ua frol amarielha na tapada,

cumo un cato ou cumo un roque.

Un bózio de rábia, alcatron cun oulor a fresco,

mofo scundido na parede...

I la poesie yá sona ferbiente, amerosa,

para miu i buosso cuntentamiento.

Anna Akhmátova, ousando la trduçon de l russo para pertue´s de Manuel Seabra [Poetas Russos, Relógio d'Água, 1995]

Hamlet

Serena l albrote. Ne l trabiado stou

acontra l portal de la puorta,

al loinge, recoincendo de modo zlido

l que l miu tiempo puode inda traier.

L scuro de la nuite cuorre a cacharron porriba de mi

miles i miles d'uolhos que me míran;

mas Abba, Pai, se essa fur la tue gana,

aparta este cálece de ls mius beiços.

Cun firmeza l tou querer ten l miu amor,

este papel que me deste quiero tener;

mas agora purpara se un drama defrente:

poupa me agora de l tou camino.

Assi i todo la orde de ls atos nun demuda,

la fin de l camino ye bien cierta.

Stou solo. Agora ye l tiempo de ls Fariseus.

La bida nun ye cumo un passeio al campo.

Nun dá jeito ser afamado

puis nun ye esso que me upe.

I nun bal la pena tener arquibos

nien perder tiempo cun manuscritos bielhos.

L camino de la criaçon ye l'antrega cumpleta

i nun fazer rugido ou tener sucesso.

Anfeliçmente, nada quier dezir

cumo ua alegorie andar de boca an boca.

Mas ye perciso bibir de modo hounesto,

bibir dua tal maneira que na fin de cuontas

benga até nós un amor eidial

i óubamos l chamar de ls anhos que han de benir.

L que ye perciso ber outra beç

ye l çtino, nó antigos papeles;

lhugares i capítalos dua bida anteira

anotar ou eimendar.

I margulhar ne l anonimato,

i scunder ne l ls nuossos passos,

cumo scápan las bistas na nubrina

al meio la scuridon.

Que outros nesse rastro bibo

seguiran l tou camino passo a passo,

mas tu própio nun debes de çtinguir

la derrota de la bitória.

I nun debes por un solo sfergante

arrecular ou atraiçonar l que tu sós,

mas star bibo, i solo bibo,

i solo bibo - até la fin.

Boris Pasternak [Moscovo, 1890-1960], zde ua traduçon de l russo para pertués por Manuel de Seabra [Poetas Russos, Relógio d'Água, 1995]

a la moda de antrada

Ne ls terribles anhos de 'jovismo' [de Ejov, xefe de la polícia secreta de Staline] passei zassiete meses nas filas de la cadena se Leninegrado. Ua beç, até ua pessona me 'recoinciu'. Por esta altura, ua tie de beiços azulados que staba atrás de mi, i que pula cierta nunca oubira sequiera dezir l miu nome, spertou de l suonhos an que todas stábamos i preguntou me al oubido (eilhi todo mundo falaba baixico):

- Podeis cuntar esto?

Respundi le:

- Puodo.

Ende, a modo ua risa slubiou se por aqueilho que an tiempos yá habie sido l rostro de la tie.

Abril de 1957, Leninegrado.

Anna Akhmátova [1889-1966], cun assento na traduçon de l russo para pertués, feita por Nina Guerra i Filipe Guerra [Só o sangue cheira a sangue, Assírio Alvim, 2000]

Guarda mie fala para siempre

Guarda mie fala para siempre, pul gusto a fumo i mauga,

Pula resina de l stoicismo, pul peç de l trabalho lhial.

Ne ls poços de Nóvgorod adocicada i negra ye l'auga

Para spelhar la streilha de siete barbatanas pul Natal.

Para esso, miu pai, miu amigo, miu bruto ousseliar,

You, armano squecido, de la familha de l pobo arrenegado,

Tan ancestrales poços scabarei que ls Tártaros, ne l baldo,

Puodan abaixar al fondo del ls príncepes para ls afogar.

Para que me ámen estas forcas ancarambinadas you dou le

Al gorodki - jogo an que me apúntan la mala muorte -

La camisa de fierro nun tiro mais, acharei ne l monte

L cabo pa la machada cumpridor de l'orde de Pedro.

(3/5/1931)

Óssip Mandelstam [1891-Moscovo 1938], ousando ua traduçon pertuesa de l russo feita por Nina Guerra i Filipe Guerra [Guarda a Minha Fala para Sempre, Assírio Alvim, 1996]

Bistas cun mundiada

Uas bistas cumo dében de ser, melhoradas pula mundiada.

Solo se bei la carapota de las arbles, campanairos i capielhos d'eigreijas.

l que se quier dezir assoma se a la boca afogado pula eimoçon

i de l nobielho de las palabras solo se salba 'era'.

De l mesmo modo, l speilho amostra de l beterano la tiesta i la calba,

mas nó l rostro, para nun falar de ls colhones. Ambaixo, l'auga

lhieba todo l que se screbiu ou dixo. Porriba,

un farrapo de nubre. I tu de pies al meio l'auga.

Talbeç l sítio de l'acion seia an algun sítio de ls Países Baixos,

antes de tenéren las presas ilas rendas, nome cumo De Moll

ou Van Dyke. Ou antoce l'Ásia, ne ls trópicos, adonde stan afeitos

a l'auga que adóndia l suolo, mas tu nun sós arroç.

Bei se que stá a chubir yá muitá, pinga a pinga, un die apuis outro, anho apuis anho,

i que toda esta auga doce apledia por nuobas jeiras d'arada saladas.

I bieno l tiempo de poner l nino als ombros, cumo un periscópio,

para ber al loinje l feturo de ls nabius de l einemigo que ende bénen.

Iosif Brodskii [Leninegrado 1940 - 1996 Nuoba York]

cun assento an traduçon, de l russo para pertués, de José Leite, an Paisagem com inundação, Cotovia, 2001.

Miu abó nun lie bersos

Tubo anton que deixar la hourtica

que tanto le gustaba i l lhumico de l lhar

i bieno ua purmeira beç abaixando la cuorda

de l lhitoral i cumo era moço moço

quijo alhá saber de ls bersos

de la senhora Rosalía de Castro

parecie le l paiç jeitoso

las rapazas tenien modos

suables i dua sien remédio

se namorou lhougo

mas esso fui de la segunda beç

quando yá era l amprouado duonho

de la mula de l soto del

an Sangalhos achórun que era un metediço

fazírun le ua spera a tiro

scapou se cun alblidade al fin casou se

l nieto ye que muitos anhos apuis

choraba por el al ler na mocidade

téñovos pois que deixar

arboriños que prantei

fontiña campanas Virxe d'a Asunción

com un aperto no corazón

Fernando Assis Pachedo [que hoije, 1 de febreiro fazerie 75 anhos se fura bibo], in Variaçoes em Sousa (1987)

[Teve pois que deixar la hortinha

que tanto amava e a fogueirinha do lar

e veio uma primeira vez descendo a corda

do litoral e como era moço moço

quis lá saber dos versos

da senhora Rosalía de Castro

parecia-lhe o país jeitoso

as raparigas tinham modos

suaves e de uma sem remédio

enamorou-se logo

mas isso foi da segunda vez

quando já era o garboso dono

da mula do seu comércio

em Sangalhos acharam-no um intruso

fizeram-lhe uma espera a tiro

safou-se com habilidade enfim casou

o neto é que muitos anos depois

chorava por ele ao ler na adolescência

téñovos pois que deixar

arboriños que prantei

fontiña campanas Virxe d'a Asunción

com un aperto no corazón]

Las mies palabras

las mies palabras

znudei las

até eilhas me quedáren

resfolgando amplaches

ambaixo la lhéngua.

Buolbo las

cuçpo las

sorbo las

assopro las

stico las

de ls pies a la cabeça

stendo las

Fago las grandes

cumo ua nabe lhunar

i pequeinhas cumo un nino.

Busco an to la parte la lhinha

que me diga

adonde me puodo achar.

Ulla Hahn [Almanha, 1946 -]

[Serbi me de la traduçon de João Barrento, A Sede entre os limites, Relógio d'Água, 1992]