Ua águila iba atrás dua lhiebre pa la caçar. La lhiebre bien corrie, mas nun bie meia de se salbar. Al ber-se perdida, boziou-le a un scarabeilho pa que la salbara.
Antoce, l scarabeilho boziou-le cun to la fuorça a l’águila pa que deixara la sue amiga na paç. Mas l’águila çpreziando l scarabeilhico, caçou la lhiebre i comiu-la mesmo eilhi delantre del.
Zdende, buscando un modo de se bingar, l scarabeilho miraba an todos ls sítios adonde l’águila ponie ls uobos i apuis, quando l'águila nun staba acerca, botába-los a rodar i atiraba cun eilhes de l niu abaixo.
L’águila al ber que nun staba assossegada na sítio nanhun, pediu-le a Zius que le dira un lhugar seguro para poner ls sous felhicos. Zius oufreciu-se para ls poner ne l sou regaço, mas l scarabeilho, al ber la tática de l’águila, fizo ua bolica de stierco malcheiroso, bolou i deixou-la caier ne l regaço de Zius.
Zius albantou-se mui delgeiro para sacudir aqueilha porcarie toda i assi botou ls uobos al suolo sien se dar de cuonta. Por esso, zdende, las águila nun pónen uobos ne l tiempo an que ls scarabeilhos ándan a bolar.
Porqui se bei que nunca debes de çpreziar l que ye pequerrixo, puis nun hai un ser que seia tan andeble que nun te puoda alcançar.
Sem comentários:
Enviar um comentário