Paisaige 23

Nien un chocalho de cabradas se oube yá pulas arribas: quien s’eirá agora a ampuialar nas faias?, quien acenderá ls carreirones que arrepassában para alhá de ls piquetes?, a la falta de chibicos adonde se le agárren ls uolhos, que poderá inda porqui aguantar las águilas? An todo l silenço se colga, tan pesado que se puode agarrar a las ambuças cumo auga na ribeira. Nas angúrrias de l tuoro dua oulibeira assoma-se l tiempo, que ye siempre nuoba l’auga de l riu. Solo mui loinge s’adebínan las cabecicas de las cepas. Ne ls buracos de las faias, ls Miedos cuntínan a ressonhar sues cuontas, que s’agárran al berde-negro-cinza de l lhibro que çfólhan nas patrielhas. Anquanto come l folar, bai la quadrilha buendo las arribas cun sues máquinas de retratos. Pul cielo, l fumo de ls abiones zeinha la selombra de l riu al alrobés.