L feno

Trabalho alredror de l feno (pintura de Bruegel)

Streportando Feno (pintura de Rosário Andrade)

Diç l dito que «la yerba stá no culo de Maio». La primabera bai agora na sue mais grande fuorça i la yerba crece por todos ls lhados, mesmo adonde nun habie de. Era delantre desta fuorça que arrebentaba an berde que tiu Chico Fonso, bezino de mius pais, dezie por esta altura de l anho, «quien me dira ser burro!».

Antre las dues pinturas puostas arriba, de Bruegel i de Rosário Andrade [ http://impressoeseintimidades.blogspot.com ], ban arrimado a quenhientos anhos, mais tiempo que l que bai antre l trabalho coletibo de l feno i l streporte solitário de la carroça cul burrico, assi a modo ua fin de fiesta de ls antigos trabalhos de l campo, que you inda fiç por muitos anhos. Dun lhado las ruodras de pneu de la carroça; de l outro ls forcones a ajudar a assegurar la carga, anquanto las béstias s'aporbéitan de tanta fartura; ne ls dous lhados l mesmo rastro al ombro de las figuras. Hai inda ls amarielhos de Bruegel i l berde de Rosário Andrade: un trabalho dua canseira sien fin que Bruegel zroba an burmeilho i amarielho; la lhebeza delgeira de Rosário Andrade, que quaije tenemos que agarrar l tiu que lhieba l burrico senó scapa-se para fuora de l quadro. Anque pareça que nun demudou, nien l feno ye l mesmo.

Hoije nun sou capaz de passar sien lhembrar dues cousas: ls gadanheiros que abaluában quien fazie l melhor baranho i, na fin de l die, se queixában de nun sentir ls renhones, çfeitos ne l bai i ben de la gadanha; la munha que, al meter l feno ne l palheiro, s'anfunisgaba por todos ls lhados i até parecie que passaba a circular nas benas, que a las bezes deixaba un cun un resfuolgo armano al de l anforcado ne l redadeiro segundo de bida.

Nien pinga de suidades, mas son pesadas las lhembrácias.