Tiu Manuel Paulo, gaiteiro de bal de Mira, agora i an 1940 (Paulo Meirinhos)L guapo retrato tirado por Paulo Meirinhos saquei-lo de http://nuobas.blogspot.com
Ls moços de l grupo Galandun Galandaina ándan a saber de l berdadeiro sonido de la gaita mirandesa i para esso fazírun un juntouro l atrasado die 2 de Júnio an Fuonte Aldé. L'eideia ye buona, mas nun ls puodo ajudar muito. You çtingo esse sonido de modo mui simpres: se fur de gaita mirandesa, faç-me piel de pita.
Deixo a seguir ua poema screbido por Fracisco Niebro yá uns anhos, cumo houmenaige als gaiteiros mirandeses, i que lhembra l tiempo an que el era rapazico i andaba atrás de l gaiteiro pulas rues, ne ls dies de fiesta, fazendo culs outros garoticos un carril de streilhas.
Alborada
Bola un fuogo de música pul aire: naide sabe que diuzes l acendírun.
Scamuge la nuite i chiçca ua cantiga.
Dreito al Sol, camina, sien miedo, a chamar la Lhuç.
Ben ende l acendedor de l die, arteiro de manhanas.
I al miedo de ls ampeços, bózia: alboraaaaaaaada!
Sperou que la redadeira streilha se rendira
Beisou la boca l aire sultou l’alma
Scuitou l cielo a antrar na sue cantiga
Arrebentou-le l coraçon d'assopros
Bolbiu-se l mundo todo an trabiado
Ninos, son carril de streilhas
Ninos, rabo dun cometa
Ben la bida a la jinela
Zayuno de lhuç i sol
Ui la gaita! Ui!
Apuntou l bordon al sol - Ouraçon
Arredundou ls uolhos de risa – Nino
Anchiu cul’alma peito i fol - Sprito
Bolbiu ls dedos an sonido - Magie
Sembrou spertares pula rue - Nacer
Fracisco Niebro
(20 de Maio de 2001)
Sem comentários:
Enviar um comentário