Sanjuanes: yerbas oulorosas ousadas nas fogueiras de San Juan [retrato de C. Ferreira]San Juan, tan bun rapaç
Q'a cada anho nace moço,
Balei-me cula mie huorta,
Yá nun hai auga ne l poço.
Sembrei muito cebolhino,
Pus pumientos de ls queimones,
Lhebai-los até la mesa
Que bos dou mais ouraçones.
A ber se nun mos faltais
Astanho pa la fogueira,
Sien tener pio nas moças,
Que bos spéran na Parreira.
Quando las chamas bruáren
I spargíren ls sanjuanes
Sou oulor por to la rue,
Tomai cuidado culs panes
Que puoden arder an claro.
Cumo nunca stais cansado,
I na segada quedais
A la selombra deitado,
Bá a ber se fazeis algo,
Que la bida anda mui mala:
Qualquiera die, a saltar
Fogueiras, nun hai quien sala.
Ponei-bos listo! Datrás
Todo mundo bos querie:
Agora nun sei que passa
Que buossa fiesta nun ye
La mesma que datrás fui.
Tanto tiempo hai que nun bi
Saltar l fuogo i dezir
Sarna an ti salude an mi.
Talbeç yá nun haba sarna,
Mas digo-bos you, anton,
Que la salude ye pouca
I ls males mais de mil son.
Talbeç todo esto mos benga
- Mas you sei que naide l nota -
De faltar cantiga i bersos
Que fazie tiu Quito Cota.
Ouraciones ambersaba
I pedie pa le traieres
Todo de l buono pul campo,
Cumo se furas tu Ceres.
Agora tocou-me a mi
De tous bersos l'anquemenda,
Por m'aparecer a ti:
Dous boubicos sien eimenda...
Fonso Roixo
Sem comentários:
Enviar um comentário