Zertos i mundos

Lhinha de l ángulo antre zerto i cielo: Tunísia (Ana M.F.)

Lhinha angular sien fin antre cielo i tierra

Donde las alas de ls uolhos se deténen

Al loinje an prainada buolbe-se la sierra

Caminos por donde ls uolhos ban i bénen.

Assi un dius mos deixou cachos de l mundo

Sien acabar de ls fazer que al sesto die

Se fartou de la sue obra, tan perfundo

Delor i remordimiento anton sentie.

Mesmo an retrato trai l zerto para acá

La fuorça que mos angulhe i apuis mos smaga

Tan pequeinhos cumo un dius somos alhá.

Hoije hai mais giente que strague i todo açaga

Mas un mundo pa bibir naide mos dá

I quien querga un mundo sano anton que l faga.

Fracisco Niebro